(حديث مع البحر )
*****************
يالي تناجى البحر
وترمى شباكك ليه
إيه اللى بينه وبينك
قلى حكايتك إيه؟
يابحر مين علمك
تسمع حكاوينا!!
علمتنا نحلم
نكتب غناوينا
بنغوص فى أمواجك
نرسم امانينا
في الروحة والجاية
تزرع حاجات فينا
بالنسمة والميا
موجك مهادينا
وأنا دايبه من سحرك
أمتي ترسينا
ماشيه عشان خاطرك
م الشط للمينا
واقفه فى محرابك
بكتب أسآمينا
يابحر ساكنى
هجرك على عيني
صمتك أنا سمعاه
في الحلم بيجيني
نبضك أنا حساه
لو غبت يشكينى
مره بتضحكلى
مره تبكيني
دايما متوهني
يا بحر رسينى
برك أنا شطه
والشط كافينى
دا حبيبى من لونك
طول عمره بيصونك
مرساك على شطه
ولا مره بيخونك
وشوشت فيك الودع
واحتارت ف جنونك
سألت فين الجدع ؟
ما يعيش من دونك
معادى هنا وياه
بالفرحه بستناه
طالبه ياموج عونك
يابحر متقلى
طيرى أنا عشقاه
أمتى الهنا نلقاه
هبعتله مرسالى
مع نجمه بتلالى
أمانه لتقوله
الفرحه من غيره
والله متحلالى
#فاطمه علام #
ليست هناك تعليقات:
إرسال تعليق