من قلب حضن الوجع
هخطف دليل فرحة
أضحك بغيظ للجدع
وارمي عليه طرحة
أكتب كمان موال
يوصف لي راحة البال
أصل الفرح أشكال
والصورة مش واضحة
عشنا سنين البدع
وعاشرنا ناس جارحة
ونسينا إن الودع
والميه كات مالحة
الجيب ملان بالمال
البدلة جنب الشال
الشمس عال العال
والتوتة مش طارحة
بعنا زمان الوسع
خدنا الحلال منحة
وظلمنا ناس بالسمع
بقلوب كانت بجحة
الحب عدى ومال
كل الكلام إتقال
لبس الجمال اسدال
والأرض مش صالحة
شفنا ليالي الفزع
جه للنهار قرحة
قلنا كلام السجع
طلعت حروف رايحة
أجيال تجيب أجيال
بقى للورود اشبال
اتغيرت الأحوال
بس الذنوب فاضحة
جوه الصدور الجشع
خلى الدموع طافحة
حتى الغزل والدلع
والنبضة مش فالحة
بنقول يادوب أمثال
عيال تجيب في عيال
الميه في الغربال
والسوسة في القمحة
طارق شامخ عبد الجواد
ليست هناك تعليقات:
إرسال تعليق