جدتي
كان ليا جدة حنينة
ولها ابتسامة لينة
وتشوف سماحة وشها
تقول دي ست هوينة
لكنها وقت اللزوم
حازمة وشاطرة ع العموم
وبنظرة منها ومعلمة
تلقاها بتزيح الهموم
يمكن ملحقتش العلام
لكنها زي الحسام
ف كلامها روح متعلمة
ازاي يكون الاحترام
علي وشها رسم الزمان
للحكمة وشم وصولجان
وحفر علي خدودها محن
تجاعيد وخارطة للمكان
والحكمة منها بتتولد
كانت في مجلسها أسد
ولا حد فاقها ف المقام
لا عمدة كان ولا شيخ بلد
بالحكمة بتغذي العقول
ولو انت مش عارف تقول
ولا أفلاطون في الفلسفة
في الحرب جندي أو رسول
وعشان ماتتغذي البطون
كانت بتطبخ ع الكانون
أحلي غدا تتخيله
مع إنها مش شيف ومش ممكن تكون
المحشي بترصه ف سطور
وكأنه جيش واقف طابور
والريحة منه مفحفحة
ومحمرة معاه الطيور
وترصه بعد مايستوي
فوق الطبالي وارتوي
ياقلب عطشان للدفا
من جدتي تشبع أوي
نقلت علامها للجميع
بما فيهم الطفل الرضيع
والأم والخالة كمان
للأب والعم الوديع
آخر كلام من بقها
من غير ماحد يوزها
حافظ على اخواتك ياواد
وقصيدتي دي من حقها
دي جدتي كات بنت مصر
سوا ساكنة كوخ أو جوة قصر
هيا اللي باقية وكلنا
ماشيين وهي ف كل عصر
تحياتي
شيخ السجالات
البدري زايد.
ليست هناك تعليقات:
إرسال تعليق