فى همس الليل
أنا شايلة ومتحايلة على النسيان
جدار الصمت وتنهيدى
تقول زيدى
خلاص دا الحب ضيعنا
ورجعنا نقاسى كمان
فى همس الليل
أنا وحدى ومش قادرة على الكتمان
وساعة فى شوق تكون عيدى
لنتلاقى ونتحاكى زى زمان
فى همس الليل
شموع تطفى ونار تدى
الحياة ألوان
ولما أكون باتألم
وبتعلم سنين اليأس
بتجينى تحاكينى
وتشرح لى وتنصحنى
على العصيان
فى همس الليل
دموع عينى تشاكينى
تقولى يا روح
ليه ترضى
عذاب الهجر والحرمان
ويوم ما أبكى تقاضينى
وتحلف لى على الأحزان
فى همس الليل
أنا شاردة ومش فاردة
القلوع أشجان
وباتمرد على حبى
وأضحى بالقلوب أزمان
فى همس الليل
قلوب حايرة ومش طايلة
تعدل الميزان
وكل جفونها مشتاقة
وتواقة
ويحرقها الحنين بعيدان
فى همس الليل
ونبضى يكون فى حكمى إيمان
وتتجدد لى دقاته
وحياته للهوى عنوان
فى همس الليل
وقلبى عاش على ذكرى
وباتمنى تعود تانى
وألقاها وتلقانى وتعرفنى
وقلبى يفارق الأكوان
ساعتها الفرح ح يسلم
يدادينى ويروينى
وييجى الصبح كله حنان
# بتول العتربى
ليست هناك تعليقات:
إرسال تعليق