يا مسطرين الكلام
ليا رجاء وعتاب
صحوا الضماير فى سطري
وأنفوا ضميره اللي غاب
حركوا كل الحروف
واعملوا حساب الظروف
أعلنوا عن قلب تاب
صففوا كل الجمل
جملة فرح بلون عذاب
وجملة تشكلها مضاف
ليها مبدأ بس خاف
من خبر يمحي الحقيقه
ماشي في طريق السراب
وأعذروا لو حرف يبكي
أو يكون منصوب بكسرة
عمره كان مربوط بلحظة
فيها سكر بس داب
لملموا كل الحروف
أوزنوا كل الكلام
هتلقوني بجد شايل
جوه روحي هضاب تلال
كنت حابب جوه سطري
يترسم فيه الأمان
يا مطورين الكلام
من فضلكم نفسي
سطرين محبه وغرام
ومُصَالحه مع نَفسي
علشان يزيد الأمل
ويهل بدر بدور
يجبر هوي مكسور
ويطيب ويحلالي
أنا سطري بيعاني
لفيت علي الأيام
أسأل علي حالي
ملقتش فيه ولا يوم
يراسلني بالمقسوم
أو حتي يصفالي
قلمي الحزين حيران
واقف علي الضفه
ناسي الطريق والجار
مفطوم على العفه
بحار أنا وعمري
ضايع فى موج غدار
لون بحري لون حبري
ولون السما والدار
الحلم نبضه ضعيف
خايف من الإعصار
ليتوه فى وسط الريح
يرجع ملان بالعار
مسجون معاه الحرف
والظلم ليه ألوان
محكوم عليه بالطرد
من دايرة الأعيان
علشان هزيل العود
شقق وشاب واتهان
يا مفرقين الحروف
شدو معايا الحيل
قبل الأوان ما يفوت
والحرف مني يميل
يا مسطرين بنجرح
محتاج للحظه فرح
تمر جوه القلب
تعِدل فى باب انقلب
تفتح صمام اتسد
هلكان يعاني البرد
نبضاته نايها حزين
كهربته طالها الرعد
هزت سواد العين
يا مسطرين الكلام
ل حكايتي ليه ناسيين
أنا لما سطري طلب
حرفين سعادة وطرب
....وكلمتين دافيين
كان الجواب منكم
رافض يداويني
الكبر فى قلوبكم
حالف يعاديني
يا سطري يا مسكين
حقك علي عيني
عشمك فى بني آدمين
فى وحلهم عايشين
مفرومه ملامِحهم
فى الأرض ويا الطين
خلصت حكاويهم
وأنا ليا رب معين
....... ......... .
بقلم / هدي النحاس
ليست هناك تعليقات:
إرسال تعليق