(شايل همي)
انا ابويا كان شايل همي
والقرب منه يطمني
بيحطني فوق علي الحاجب
ويشلني دايما في النني
ولما ابويا صبح غايب
ولا حد بقي يسأل عني
واتلمو حواليا قرايب
القرب منهم جنني
*******
حتي اللي واخد من دمي
في السر كان بيغير مني
بيعض فيا وانا غايب
وفي وشي جاي يكلمني
ويحط سكينته في قلبي
وانا اللي فاكره بيحضني
*******
والدنيا صبحت مش هيه
والدم بقي زي الميه
بياخدو من قوتي وزادي
ويفرقوه علي الحراميه
وبيكرهو حتي ولادي
و يقفلو عنا الميه
والظلم بقي هو العادي
شيطان ولابس جنية
*******
يا ابويا كان نفسي اشكيلك
وامسح دموعي بمنديلك
ومهما اشوف من نار بعدك
هرفع ايديا وهدعيلك
واقول يارب ارحم عبدك
ملناش يارب رحيم غيرك
*******
يارب انت اللي عارفني
لو في الجبل برضه شايفني
دا انا ابويا ساكن جوايا
واسمه مكتوب مع اسمي
ولو بشوفني مع مرايا
ملامحه دايما تحبسني
ابويا وسط الكون أية
وعينه دايما تحرسني
وعينه دايما تحرسني
ليست هناك تعليقات:
إرسال تعليق