مسحراتي
لافف يوماتي
منقراتي
علي طبلتي ياوحدتي
ياغربتي
علي مهنة بارت
علي مهنة غارت
بصحّي ف الصاحين
مسحراتي
اسمع آهاتي
وحكاياتي
من الأسعار أنا ف جحيم
جحيم ف لحمة
ودنيا زحمة
بقيت ف لخمة
اللحمة ضاني دي مش عشاني
والشمبري للفنجري
متلجة
لناس اهي عايشة متلجلجة
وكمان فراخ
من سعرها الكل داخ
حتي الطماطم المجنونة
زاد جنانها دايخين عشانها
السعر خاننا ولا خانها
يامصريين
ياموحدين
حتي الرغيف بكل عزم
صار صغير بقي زي قزم
بتوع الحاف يناموا خفاف
تصحي تبات
مفيش زيادة ف مرتبات
حتي الزيادة
اهي كالعادة
متخفي حتي طبق الفول
واديني بقول مش معقول
الفقر طاب لي والدق علي طبلي
أنادي هَبلي
بعلو حسي غلبانة نفسي
من غير ماادادي
اديني بنادي
يللا السحور
عايش ف ضلمة
نفسي ف نور
نفسي ف طريق مستقيم
رمضااااان كرييييييم
هشام سليم
شاعر الحرافيش
ليست هناك تعليقات:
إرسال تعليق