أيها الناس اﻷن الرجل الذى تحت الشجرة يتكلم فاسمعوا
■ رحيل العمر ■
أه م الدنيا وحالها العايب
خلى شعرى ابيض شايب
ايام عمرى عنى بترحل
وسهم الحزن معلم صايب
..........
تحت الشجر العاجز بحكى
هما اصحابى وهما مﻻمحى
تبكى عنيا وينزف جرحى
على ايامى وحظى الخايب
..........
دايما شارد مع افكارى
مين يداوينى يطفى ف نارى
حتى الشجرة بتبكى ف جارى
ﻻنا وﻻ هيا مالناش نايب
..........
أه يا شبابى الضايع منى
حتى الفرحة بتبعد عنى
أنا بحكيلك ع اللى كسرنى
شراع الهم محمل جايب
..........
شفت الدنيا عملت فيا
ضهرى المحنى ودمع عنيا
حتى الرعشه ماسكه ايديا
وجسمى ولبسى حتى الدايب
..........
انا بندهلك تسمع صوتى
نار الوحده بتاكل قوتى
حد يجينى ويشهد موتى
حتى الصاحب باعنى وغايب
..........
لملم يﻻ كل حروفك
حاول تنسى كل جروحك
خدلك عبره منى لروحك
بص كويس تلقى عجايب
..........
لما الفرحه تفارق دارك
وﻻ حدش يعرف مقدارك
وتموت وحدك ويا اسرارك
ايه الباقى إن كنا حبايب
..........
لما يجف الشجر اﻻخضر
وتسمع صوت أعذر من أنذر
واﻻبيض من بعد اﻻسمر
يﻻ بسرعه إرجع تايب
أه م الدنيا وحالها العايب
خلى شعرى أبيض شايب
أيام عمرى عنى بترحل
وسهم الحزن معلم صايب
.........
تحياتى
فراج خشبه
ليست هناك تعليقات:
إرسال تعليق