وآهين
وآهين ع الحزن اللي مكلبش ف جدور الروح
وفراق مستندل طول عمره وملوهش طموح
وقلوبنا الهشة اللي بتضعف مع هبّة ريح
ومشاعر فينا كتير نامت والباب مفتوح!
......
بنّام على حلم ونستيقظ على صوت صدمات
فتهد السور اللي مابينا وبين الاوقات
فنلاقي العمر يادوب ثانية ومعادش سنين
وخيالنا العايش ف الجنة ف جهنم مات!
..........
وحبيب ولا يمكن نتصور ولا كنا نظنّ
نلقاه بيبيع اللي مابينا ولغيرنا يحنّ
والدنيا الحلوة المليانة بأجمل تفاصيل
تستبدل كيلو من الفرحة بهموم بالطنّ!
........
ومفيش ف حياتنا حاجات دايمة ولا شيء ثابت
والايد الماسكة اما وقعنا علطول سابت
والدنيا تملي اما بتوعد تخلف وتخون
وبتاخد منا اما بتدي ضعف ماجابت!
..........
وأعز الناس رحلوا وغابوا ولا سابوا وداع
كانوا حلم جميل بس اتصدّع واتهد و ضاع
وان عشنا العمر عليه نبكي عمره ماهيعود
من امتى الريح زقّت مركب وملوهش شراع؟!!
.........
من فين هنجيب للي بيحصل قوة وصمود
ونيران اليأس مابتنامشي ولا ليها خمود
والقلب النايم ف ضلوعنا مهموم وحزين
ومشاعر بارت اسواقها بقى فيها ركود!
سميرمحمود
ليست هناك تعليقات:
إرسال تعليق