حرف ورد مع منشور
الراحل الفنان
عطيه شواش رحمه الله
والشاعر عوني هشام
==========
رومانسيه مصريه
الجميل في الحب إنه
في العدد زي اللمون
حب امك ... حب ناسك
لو حتضحك ع الدقون
إنت في بلدك مالكشي
إنت في بلدك زبون
إنت في بلدك بريزه
لما حنسد الديون
إنت في بلدك (عزيزه)
لما (يونس )في السجون
الرفاقه بقلب ميت
كلهم صابهم جنون
الخناجر حزنتني
والقنابل والدقون
واللي يعمل لك مناضل
ف الشوارع مبدعون
الأدب في العشق واجب
الأدب عم الفنون
لما تلعب لعبه وسخه
وف بلادك جبت جون
علمينا يا مراكب
السفر من فين يكون
علمينا مره نكره
علمينا ازاي نخون
....... عطيه شواش
'''''''''''''''''''''''''
خلاص يادنيا
'------- -------- عوني هشام
---------‐------------------------
الجميل فى الحب انه
فى الزمان دا بقى الف لون
يطربك احساس بفنه
ويجرحك بعدين يخون
ع الشات تلاقي كتير وياما
ع الواتس عِد زي اللمون
تحب واحده هيمان معاها
وانت واحد يادوب زبون
تسمع معاها مواويل لطه
تعزف انت بالسكسفون
جينا دنيا وعشنا فيها
عينها فاجرة فيها المجون
اسعار تولع فى اللى يعاديها
وقرارها اسي غَسٌل الصحون
اللحمه اشوفها واشتهيها
يادوب فى صوره تملا العيون
اغمى عينى وادش بصله
واحط فوقها شويه لون
اجيب العيال بلقمه ناشفه
واقول دى لحمه تحشي البطون
حاولت اساعد عرضت نفسي
جابت بريزه وزاد الديون
لكن اللى يعمل انه مناضل
تلاقيه حرامي سارق له جون
يفوز بماتش من غير عداله
ويعمل مظاهره بالمكرفون
حتى الادب بقى جسم فاضي
لا تلاقي حكمه ولامبدعون
............. ....( الامن رحم ربي)
العيب فى دنيا ولا فى ناسها
صنعولنا كارو بلمبات زانون
عايش معاكى يا دنيا خاينه
كفرت بيكي واليوم هاخون
هاروح بعيد بعيد لوحدى
سرقتى مالى وضاع البنون
فى الليل اسبح واناجى ربى
على كل ظالم ادمى العيون
خلاص كرهتك مش عايز اشوفك
سودتي عيشتى بفواتير صابون
اغسل وراكى فين منتهاكي
طب خفي حبة ع المعدمون
خلاص كرهتك وعندى صورتك
لكن ملامحك عمت العيون
خلاص يادنيا
............ عوني هشام
ليست هناك تعليقات:
إرسال تعليق