قالوا بتضحك
على قَد الضِحك الِّلي ف عيني
هتلاقي عياط
ودموع وأنين
ووجع وآهات
والحُزن سنين..
عَمَّال يتمشى على جبيني
فَمَتِظلِمنيش...
وتقول دي بتضحك وتهزر
أيامها بَقِت وَرد مزَهَّر
وعيونها بِتِضحَك بتلاغي
وَرد البساتين
من غُلبي بَلَهِّي ف أوجاعي
بَأْمُر فِ القلب كمان الروح
وبقولَّها لازم تِنطَاعي
وتقولي آمين
لاتفَكَّري في قلوب غَيبانَة
ولاعِين باعِت من غير ذكرى
ولاقلب اتمَرَّد على فِكرة
وحَب ف ملايين
خليكي مَثِّلي فِ الضحكة
وَاسِي ف قلبِك نَسِّيه السِكَّة
مُمكن تنهاري على تَكَّة
تكوني مِ المساكين
ليست هناك تعليقات:
إرسال تعليق