ف خبايا الروح المخفية* في جدار مهدود
ممنوع م اللمس ومتسيّج* معمولّه حدود
مش نافع ابدا يتصلح* ومالوهش حلول
ولا نافع يرجع لمكانه *ولا ليه بيعود!
......
تركيبته غريبة من نوعها* كوكتيل احاسيس
وسنين عشناها ف الماضي *معدنها نَفيس
وشوية حب وحنية * مع اطيب ناس
ومواقف وحشة وعشناها* مع حد خسيس!
......
وبرغم بإنه جدار واحد* ولكنه مُهم
بسقوطه الروح لازم تسقط* معادتش تِهمّ
وكأنه القلب اللي بينبض* للروح فتعيش
او زي وريد معروف عنه *بيجرّي الدم
.......
من كتر ما كله بيتغابى* وعليه بيدوس
بقى عامل زي الزرعاية* وواكلها السوس
فيدبّ الضعف ف اوصاله* ويجيله هزال
ويحاول يبحث عن ضيّه* مايلاقي شموس
.......
وف ركن القلب كمان تلقى *حبة حكايات
وحبيب كان عايش علشانك* وطلعلك مات!
وحاجات بتأثر في مشاعرك* وتدغدغ فيك
وشوية ذكرى اما بتيجي*بتهد الذات!
.......
واحنا الاشخاص اللي قلوبهم* كلها احساس
ومابين الخلق بنتصنف *من أطيب ناس
وياويله اللي احنا بنخلصله* ومايقدرناش
نعتبره صفحة واتقطعت* من بين كراس!
ليست هناك تعليقات:
إرسال تعليق