وجايّ الصُبح مِتأنِّي
ومِتحَنِّي
ومِستَنِّي
يِشِدُّه الفَجر من إيدُه
يقابل كل مَواعيدُه
مع الفرحَة
مع الأحلام
عُيون بِتْنام
عيون تِصحى
عيون شَقْيانَة
فِ المَسْعَى
وناس مَساكِين
وناس تانْيين
بِتِتفرَّج على المَأْسَاه
طَريقهُم تَاه
مابين الحَق والباطِل
وخَطوَة جَريئة تِجمَعهُم
تِجَمَّعهُم
وتاخُد إيد قُلوب خَضرا
تِعدِّي بيهُم السِكَّة
وتُربُط بين قُلوب فَكَّة
بحُب جديد مع المَواعِيد
عشان الصُبح يِسْتَعجِل
مَايِتْأَخَّرش
وانا ما اقْدَرش
أعَدِّي كتير على قلوبكُم
ولا قولشِ
صباح الخير
ليست هناك تعليقات:
إرسال تعليق