تأيد لقرار الملهم الغالي هاني شاكر
بمنع عيال القذارة من الغناء رحمة
بالذوق العام وبأجيالنا القادمة
ـــــــــــــــــــــــــــــــــــــــــــــــــ
نص كتبته من عامين مضوا
ـــــــــــــــــــــــــــــــــــــــــــــــــ
............ بقرش ساغ ............
حمو بيكا ومجدي شطه وحنجره
دول قطعونا زي وزه ف طنجره
هبوا العصابه لما قال لهم الزعيم
هاتولي بصله وتوم وحبة كزبره
سمعوهم العفاريت مع عمر حاحا
وابو ليله م المطريه وناره شواحه
الحاوي فيفتي قال ياخيبتي
الكعب العالي في الديزل تفاحه
ياست دينا يابنت اللذين صننوا
شافوكي عريانه سكتوا وصهينوا
على هز وسطك مالوا البنات
وصابنا السكات سيبناهم اتصهينوا
ياست فيفي والله ريفي كان مسالم
رد حيفي في الحروب عداني سالم
ولما شاف وياكي نهر من البجاحه
عمل لي حاحا ورقصلي ع السلالم
ياست نانسي صحي لي هيفا
هاموت بيأسي وعيوني خايفه
وحياة ..أبوكوا .. واللي .. جابوكوا
ورحمة شكوكو ريحيتكوا جايفه
فينها الثقافة وفين قصورها بجد
سابوا الهيافه هدت صروح المجد
فيروس خطير شايف مزاجو
ممنوع علاجه ، خدنا بوضع اليد
شبابنا رمز العفه مال للمسخره
بين الأمم شوربه وفته ف محشره
بقينا عنوان للقرف والشخلعه
لما دفنا المجدعه ، رجعنا لورا
شال الولد سنجه والبت صاجه
مشيوا وراهم بالوما آخر سذاجه
عفاريت بتسحر عيالنا بالألحان
الواد مخاوي الجان والبت غناجه
فين الرقابه يابابا وفين حماة البلد
سيبتوا الهفايا الدنايا نازلين هدد
هما اللي طالعين فوق لحد السما
واحنا اللي صابنا العمى عايزين مدد
هما اللي سكنوا القصور والفلل
هما اللي نشروا الفجور والزلل
سدوا .. بغبائهم .. طاقات .. النور
واحنا اللي جالنا الناسور والعلل
ــــــــــــــــــــــــــــــــــــــــــــــــــــــــــ
بقلمي الفلاح الفصيح معوض حلمي
منشأة بطاش /تمي الأمديد /دقهلية
ليست هناك تعليقات:
إرسال تعليق