لعله خير
بعد اما كنت انت الربيع
وأماني عمري وشمسها
لا كان ف بالي إنك تبيع
وتغيب وتحرق ضلها
فتحت عيني ف يوم عليك
ومشيت ف روحي كلها
كبر الهوى قدام عينيك
حسيت بود ف ردها
زرعت نبضك جوه قلبي
سرح بسرعة وانتشر
كان لو تغيب أو يوم يعدي
ابُص ف عيون البشر
كنت الخبر ف كل جملة ابتديها
كنت الخُلاصه فى كل جلسة انتهيها
كنت الحوار المستمر ف كل ليلة
كانت الأماني ف لمستك بتبان جميلة
انا كنت حساك ف الجينات
تركيبه فى معادلة ثبات
تفكيكها صعب من البداية
حتي مرحلة الممات
مكنش فيه ذرة شعور خالي الثقة
ولا جزء رافض للبقاء
أسست كل الأعمدة
وسعيت مرورا للبناء
كل الليالى المظلمة اتحولت
جوها حاله من الصفاء
كل الأماني المرهقة اتبدلت
وصلت لدرجة من النقاء
......ولعله خير
انسحابك كان صريح
والكلام اللي سمعته كان صحيح
مش هقولك انجرحت
صعب أوصفلك شعوري
فيك تحس إني اندبحت
وإني بتداري ف غروري
وإني بتمسك بوقت كان مريح
فيه كرامتي وكبريائ
فيه حنين عمري اللي باقي
وفيه جناح الحلم منزوع الساقين
كان بيتنفس هواك...
كان نطفه واتحول جنين
غصب عنه راح يطير
بس في نهاية المطاف
انا مش هخاف
من مِين سِمع او حتي شاف
ومين بَدرْ ورواها خير
ومين فحت وحفر ف بير
درس محتاج الف ميل
عبرة ل نهاية السنين
.........ولعله خير
..........لعله خير
ليست هناك تعليقات:
إرسال تعليق