كرهت الشعر
كرهت الشعر مش كاتبه
عشان الشعر هان صاحبه
كرهت الشعر والإحساس
يغور الحرف والكراس
هجيب الضبه والترباس
وأقول للشعر بح خلاص
كسبت انا إيه غير الحيره
عايز عكاز وتجبيره
حروف حب وحروف غيره
حروف الشعر فضاحه
وناس تقرأ ومرتاحه
يقولوا برافو دي نصاحه
ومش عارفين معاناتي
ومن أعصابي وأهاتي
بعزم الحس وبهاتي
كرهت الشعر بالمره
دا وراني ساعات مره
وكلماتي ماهيش حره
عشان محصوره فى الجره
ولو كان نقد خد عندك
عاملي فهيم كدا وحدك
مين إنت عشان بتنقدنا
دا طبع حقود بيحسدنا
وأنا والله قلبي بريئ
دا يمكن بس قلمي جريئ
عاملي حرقه فى المريئ
كرهت الشعر على فكره
لا أنا شاعر ولا دياولوا
خاطر يجي أقوم قايله
لا بتمنظر ولا قوال
يدوب حرفين وماشي الحال
لا أنا فاجومي ولا حتى الخال
وعايز أختم الموال
وحرفي رخيص ومن غير سعر..
كرهت الشعر..كرهت الشعر
ليست هناك تعليقات:
إرسال تعليق