( أنا مش حافظ )
انا مش حافظ
أنا لو حافظ
كنت قدرت اقول حكايات
كنت حكيت عن شوقي وحافظ
كنت حفظت ولو ابيات
أنا مش حافظ بس محافظ
على تقاليدنا وأي عادات
وقريت لأبو نواس والجاحظ
واقرا كتير في الحب ساعات
لكن مشكلتي ما بحفظشي
وتتوه مني كتير كلمات
أنا مش حافظ بس أنا فاهم
فاهم معنى الوفا للغير
وبشارك في الشدة وأساهم
لازم أمد الإيد بالخير
أصل الحافظ ممكن ينسى
ممكن يظلم
ممكن يقسي
حفظه ف ضل هواه بيطير
لكن الفاهم زي العالم
عارف البحر وعارف المرسى
يعرف بَرُه قبل ما يرسى
عمره ما يمشي بدون تفكير
أنا مش حافظ بس باحافظ
على مواعيدي وأي عهود
باحفظ عهدي وبصون ودي
وصلة رحمي معاها ودود
أنا مش حافظ حرف وكلمه
بس أمين لو كان فيه قسمه
باحفظ حق الغير وبصونه
عندي ضمير وباراعي الذمه
أنا مش حافظ
علشان أمر إلهي النافذ
وحنانه بيكونلي الحافز
علشان كده بفهم ما احفظشي
ربي حبيبي هو الحافظ
علشان كده بفهم ما احفظشي
ربي حبيبي هو الحافظ
بقلمي الشاعر جمال زكي عينر
ليست هناك تعليقات:
إرسال تعليق