صَبح صباحك هل
صُبحك بيتنفس
صحصح عيدان الفل
والورد والنرجس
إتوضا بنديَ الهنا
وهات ركعتين الرضا
بالعيشه والمقسوم
البسمه علي وشنا
والرزق من ربنا
بين العباد مقسوم
إرمي بذور الامل
الأرض ميزتها الحبل
بتجيب عيدان شايله كيزان
وبتجيب عيدان تاجها السَبل
إروي بعرق العمل
ماتخلي فيها شراقي
هتحصد ثمار الامل
رضا وهنا وتلاقي
واشكر لرب كريم
ليه الشجر سَبح
وصلي علي الزين
بجميل الكلام إمدح
وهات قلب كرنبه مِندي
يغسل عروق الخس
الجبنه ف الزلعه عندي
بتعوم في بحر المش
وهات رغيفين الطيبه
وتعالي بقي نفطر
دا انا عندي تكعيبه
عنبها خام سكر
وعالراكيه شاي ف الطل
بعد الفطار نحبس
وحزم جذوع النخل
مع النسمه تلاقيه يرقص
صبح صباحك هل
صبحك بيتنفس
صحصح عيدان الفل
والورد والنرجس
ليست هناك تعليقات:
إرسال تعليق