مش عايز مالك وقصورك
ولا عايز جاهك وغرورك
أنا عايز قلبك وشعورك
وايديا تطبطب على ايدك
......................
مش عايز غيبتك ووداعك
ولا عايز غشك وخداعك
أنا عايز طيبتك ومتاعك
واشعر بوجودي في تنهيدك
.......................
مش عايز صدك وعنادك
ولا عايز حزنك وحدادك
أنا عايز حبك ووداك
وأعيش بين دمك ووريدك
.......................
مش عايز هم و تكشيرة
ولا عايز حب بتأشيرة
أنا عايز خوفك والغيرة
وأكونلك كلمة ف تغريدك
......................
أنا عايزك حب يونسني
يسهر على قلبي ويحرسني
مش ياخد مني يفلسني
ويدمر فيا ولا يفيدك
...................
أنا عايزك حضن يدفيني
ويكون على قدي يكفيني
عن كل العالم يخفيني
واموت جواه وابقى شهيدك
...................
أنا عايز ودك أشواقك
واكون من أفضل عشاقك
أنا صوتك صمتك ونداءك
أنا طفلك وابنك ووليدك
.....................
القلب الشايب على بابك
كان شايل همك وعذابك
كان هو ربيعك وشبابك
كان هو مقالك ونشيدك
......................
يا ساكنة فيا وف ضلوعي
يا مالكة كياني و مجموعي
انتي اللي يهمك موضوعي
وانتي اللي بحبك وبريدك
......................
للشاعر / سمير محمود
ليست هناك تعليقات:
إرسال تعليق