انا مش عارفنى
=========
انا شايف صورتى وسط الزحمه مع الحرافيش
انا عارف انى من غير صوت ما اقدرش اعيش
انا عايش ميت فى الاحياء وكتمت الصوت
انا جوه مرايه صوره بهتانه غطتها بخيش
انا حرفى معايا عايش جوايا كأنه مفيش
انا قلمى بيكتب. فوق السطر كتير خرابيش
انا كل طموحى. اداوى جروحى بدون معاناه
لقيتنى حبيس مع نفسى كطير منتوف الريش
انا برسم حلمى جوه منامى كانه افيش
انا شايل حمل كتير على راسى وبرغيف عيش
انا كل طموحى اشوف الدنيا بدون الوان
شفت الالوان بتلون توبى كما الدراويش
ربيت اولادى كتير ع العفه بدون بقشيش
وسكرت بميه رميت الزهر ماشفت الشيش
نسيت الدنيا نسيت ايامى. وكلى جراح
ولما رجعت ولادى قالولى روح ماتجيش
رحت ف ركن بعيد مع نفسى وقلت اعيش
لقيت الدنيا. فيها بلاوى مليانه تهويش
وفى وقت منامى. لقيت احلامى دنيا سراب
وبقينا اغراب فى بيوتنا وتوبنا بواقى الخيش
============
ملحوظه // ليس كل ما اكتبه يعبر عن حالى
ليست هناك تعليقات:
إرسال تعليق