مش هسمعك
ولا عمري هقبل أودعك
ولا هرضي تاني أضيعك
...أنا همنعك
ولقلبي تاني هرجعك
إياك تفكر ف العتاب
أو حتي تتمني الغياب
وتلف طوق المشنقة
علي لحظه فارقه مرقرقه
... ،،،،لحظه لقيَ
لو يوم تفكر فى البعاد
إسحب من الروح الوداد
وخد معاك الأوردة
فكك نسيج كل الخلايا الواعدة
اكتب عليها مُبددة
تكوينها داب ف الافئدة
زارها خلاص الإكتئاب
بتحسها..... متوحدة
كل المشاعر فى العناد
بتكون صقيع متلبدة
متجمدة ومتعربدة
... مش هسمعك
ما أنا بعدي عنك يوجعك
إنزع لي إحساسي القوي
إنك حبيبي بتنكوي
وإني وحشتك بالاوي
لكن عنيد... من بره
جامد كالحديد
زود كمان عللي الملام
كسر لي صورتك في المنام
ما أنا كنت بنوتة غرامك
وأنت كمان كنت الغلام
ف القلب لك مليون مقام
كنا الحنان وبدون كلام
صمت الشفايف فجأه قام
يصرخ يكسر في القوام
........ينده حرام
أشواقنا تتبدل ل نار
مسجون شروقنا ف الغبار
وتوهنا ليه جوه الخصام
يلمس هوانا ويحضنه
.....وندوق مرار
لو يوم تفكر ف البعاد
إسحب معاك ساعه الصفا
مَزًع فى توب شرب الوفا
خلي الأماني مُغلفه
......ملهاش لزوم
يا نجم عمري فى كل يوم
أنا وأنت ليل مليان نجوم
عَدِي أوام كل الغيوم
مد الأمل وبلاش هموم
أًان الأوان فبلاش تلوم
.......مش هسمعك
✍ هدى النحاس
ليست هناك تعليقات:
إرسال تعليق