يوم ما اتولد ...... سميرة عبد الفتاح محمودي

يوم ما اتولد 
مش هابدأ الدنيا بصرخة
والف صوت
واسيب دموعي 
ع الخدود نازلين
يوم ما اتولد 
هارسم علي وشي البرئ 
مليون علامة 
للسعادة وللحياة 
وانعم بحضن الوالدين والأسرة 
من قلب. الوجود تسرق حنان 
وتغلفه نسمة دفا 
ونعيش ساعات لحظة صفا 
وانده جدي وجدتي
واعمامي ويا عمتي
واخواتي نملا في المكان 
ناخد وندي ف الاهتمام 
ولساني يبدأ بالكلام
أول حروفه .. ربنا 
ويقولي خالق للوجود 
بنحبه موت ويحبنا 
أبويا يقري ف الكتاب
وامي تحاول تحفظه 
وعلي المحبة تدلنا 
وف كل يوم
ويا العصاري نجتمع 
نسمع حكاوي جدتي 
بعد الصلاة 
عمري ما احس بوحدتي 
أو يدفع البعد اللي 
الساكن غربتي
تسكن هنا 
وتفوت سنة .. وبعد السنة  
تسكن هوايا وتغلبه
ونبض قلبي تعذبه 
وتهرب الأمل اللي باقي 
يدوب فتات 
شايفاكوا ليه بتستغربوا 
ليه بتحسبوا
عمري اللي عدي .. ف المخاض 
كنت اتولدت ..وعمري فات
دا العمر لسه معرفوش 
لسه بنادي .. لامتلاك الأمنية 
واحلم شعاع ينزل
علينا من السما 
يروي الأراضي المعدمة 
شرقانة حبات للمطر 
يا اخوانا عمري المنتظر 
لسه مجاش .. ومخاضي لسه 
والعذاب ويا الولادة
عند امي منتهاش 
باحلم ف لحظة ينتهي 
وابدأ بسكرة م السكوت 
انا عمري لحظة ما اتولد
ينسي العذاب .. يبدأ حياة 
لحظة ما أموت
...............................................
 للشاعرة / سميرة عبد الفتاح محمودي