خُدْها نصيحة
خُدْها نصيحة يا قلبي صريحة
خليك راجل واوعي تحب
لَحْسن تبقي يا قلبي فضيحة
كل كلامهم كدب ف كدب
شابة وحلوة بكلمة وغنوة
قالت حبك ولّع نار
وبتسبيلة يادي النيلة
رق القلب يا خويا وطار
انتا حبيبي انتا نصيبي
انتا دوايا انتا طبيبي
متسبنيش نفسي أعيش
ابقي ف قلبك غيري مفيش
تُهت ف عينها وف كلماتها
قلت أصونها وابقي حياتها
شهر اتنين وعدّوا أوام
وكل حياتنا غرام ف غرام
وف ليلة غَبرة ف يوم خميس
جاتلي وقالتلي جايلِي عريس
قلت اسمه قالت معزاوي
بالذمة اسمه كله غناوي
شغله ايه ميهمنيش
ان شالله حتي بياع حشيش
بدال جيبة مليان فلوس
ميهمنيش لو حتي جاسوس
عنده فيللا بحمام سباحة
حياخدني علي كفوف الراحة
طب والحب والاخلاص
قالت خلص بَح خلاص
بعتيني بسرعة يا بت الناس
قالت ابعد خليك حسيس
فرحي خلاص يوم الخميس
وقبل ما يكتب شيخ مأذون
دخلت واحدة ورقعت صوت
لقيت معزاوي بقي مجنون
قامت ضرباه بالشلوت
أتاريها مراته ترتيبها الرابع
والشرع قال بعدها مفيش
قام الشيخ مأذون متنكد
وكأنه يا خويا مطلوب للجيش
وحبيبتي دموعها ع الخد سالت
صرخت قالت متسبنيش
قلتلها يا ختي متنفعنيش
كرامتي يا خاينة متسمحليش
كرامتي يا خاينة متسمحليش
ليست هناك تعليقات:
إرسال تعليق