أمي قالت لي
أمي قالت لي اياك تاكل لقمة حرام
واوعى ميزانك ابدا ينقص اي جرام
وخاف من ربك ومتسألش حد سواه
وان الظالم مهما بيعلا عمره مادام!
وكمان قالت اوعاك يا ابني تعيش كداب
كتر الكدب هيقفل ليك كل الابواب
وخلي الصدق يكون عنوانك مهما يكون
واعرف ان الدنيا دي عامله زي دولاب
أمي قالت لي اوعى الندل ف يوم تماشيه
بيك يتغدا بعد ما تاخده وتعشيه
ويبيع كل العشرة ما بينكم ومايزعلش
واذا بتعاتبه تلقى ف ودنه القطن حاشيه
امي قالت لي ان الرزق ده شيء مكتوب
واذا اذنبت بسرعة ياروحي لابد تتوب
واذا يوم جاهل سب وعاب ورماك بالسؤ
اوعى يا قلبي تفكر يوم ترميه بالطوب
واوعى تسيب ف ايديك تتمد لحاجة الغير
وارضى بوضعك مهما ان كنت يا عمري فقير
عمر المال ما يجيب لك صحة وراحة بال
واما بترضى تحس ان انت صبحت امير!
أمي قالت لي صون والديك واوعاك تؤذيهم
واما تشوفهم اجري بسرعة وبوس ف ايديهم
هما اصحاب الفضل عليك من يوم ما وعيت
وانت جذورك راوية عطشها من أراضيهم
وكمان قالت ارفع راسك واوعى تطاطي
واوعى تعاشر اي جبان او ايها واطي
وخليك دوغري وما تلعبش ببنت الناس
مين راح تقبل إنه يكون محبوبها فلاتي!
أمي قالت لي خليك راجل واوعى تخاف
واجبر حملك انه يطبطب ع الاكتاف
واحضن حلمك واوعى تفرط ابدا فيه
عمر الحلم مايبقى حقيقة اذا ما اتشاف
أمي قالت لي وطنك عامل زي الأم
يعني عليك علطول يتطمن او يهتم
بس يا أمي وطني بقاله سنين مخنوق
والشريان مبقاش يوصل له خلاص الدم!
ليست هناك تعليقات:
إرسال تعليق