انصهار
.........
لمّا ديب الليل بيهجم
الشريط بيدور لواحده
قلبي يبقى كمان لواحده
بين كتاب الأمس ماشي
كلمه كلمه وسطر سطر
جوّه دايره حدودها أضيق
من مسافات التنفُّس
والهوا مالهوش ممر
كل شئ ف الحال يمر
زي فيلم ف سيما صامته
والمشاهد دايره بينا
مرّه تجري ومرّه تهدا
كنت ساكته وهيّ ساكته
وانفعالات المواجع
كيميا قايمه من خمولها
للنشاط والإنفجار
والنتيجه دمعه مالحه
من حدوث الإنصهار
باكتمال وقت التفاعل
واكتمال الإنشطار
أمّا قلبي نام بدمعه
جوّه دنيا فيها نار
كل نجم وله مدار
بس قلبي دار لواحده
بين حواري الأمس يسأل
وف إيديه صورة بنيّه
حد شافها ف أي حتّه ؟
حد شاف أجمل حوريّه ؟
قلبي لف ف كل حتّه
خاف تكوني متداريّه
وانتهيت وانا ماسكه صورتِك
باشتمك علشان غيابِك
واحضنك علشان حبيبتي
قلبي مشتاقلِك يا بنتي
ليست هناك تعليقات:
إرسال تعليق