صورة و تعليق
خواطر
أنا الزمان . . على أهلي جار
فقير صحيح . . لكن مش عار
بس نفسي أعيش . . ف أمان
شباك ، وباب ، . . وقفل ل دار
**
على بطني . . واشد رباط
علي جوعي . . ونومي بلاط
ومن نومي . . أقوم مفزوع
وف ضلوعي . . وجع وعياط
**
يا فقر عدي . . أوام وإتلمّ
خلّيت طريق . . النور إضلمّ
زرعت صدري . . فسايل أمل
أصبر نفسي . . واشيل الهمّ
**
طفل صحيح . . لكن شايف
أنا واعي . . وكمان عارف
كتير عايز . . لكين عاجز
طعام يومي . . رغيف ناشف
**
وف الأحلام . . كمان حالم
يمكن ف يوم . . أكون عالم
صحيح حلمي ماهوش ناجز
أكيد قدري . . ماهوش ظالم
ليست هناك تعليقات:
إرسال تعليق