بلـــــوك
أنا اللى ب إيدى ح اعمل لك
بلوك طريق لأحزانك
وح اطلي لك حيطانه سواد
لأنه أحب ألوانك
وح انسى كل أحلامى
وح امشى وابص قدامى
ومش ح ارجع لاعتابك
ومش واقف على بابك
وقولى لكل أصحابك
بإنى بقيت واحد تانى
وان انتى اللى رفضانى
وقولى كل شئ عادى
وكان غدار وكان خاين
وعَشِمنى بوهم كبير
وقولى عنى وادفاشل
وقولى فقير
وقولى وقولى ما يهمش
وقولى هوائى مااهتمش
مالوش أحلام ومتهَمِش
وزاهد فى الحياة و عايش كما الدراويش
وسلطة وقصر ومواكب ده كله مفيش
ومتنيل على عينه وعشوائى
كما الحرافيش
وف النهاية
نزلي لهم دمعتين
واتشحتفى
وبعلو صوتك إهتفى
وإبقى إحلفى
ان انتى يا حلوه اللى حذفانى
لأنى بشك
وان انتى اللى عاملة بلوك
ليست هناك تعليقات:
إرسال تعليق