جدى الغالى
من ديوان كلام عواجيز
***********
جدى الغالى
بعد السلامات
وآيات الفاتحه المحفوره
ف قلوب الخلق المشتاقه
تدخل جنات
عرضها بيعادل أراضينا
ومعاها كل السموات
والدُعا للمولى اللى خلقنا
يغفرلك
كل الهفوات
مشتاق اسمع لك
وتقول لى
الحكمه اللى ما ضلت مؤمن
وللا فارقت عقلك لساعات
من قبل العمر ما يسبقنى
وتكحل عينى الدمعات
من قبل ما أجيلك ونقابل
كل الأموات
وذنوب الدنيا الملعونه
تنهش من كفة موازينى
كل الحسنات
الدنيا يا جدى بتضحك لى
وبترسم ف ملامح شكلى
على شجر التوت اللى بيحرس
جلبية ستى اللى سابيتها
عند الخياط
وقميص الخال المطبق
جوه الدولايب
وتملى بيسأل عن صاحبه
صمت الجلاليب
ورفوف الحزن اللى ليلاتى
ف الدار بيبات
الدنيا يا جدى بتضحك لى
وبتضحك دايما علي عقلى
ف ساعات بتخدنى
على جناحها
وتْهل عليا بأفرحها
وشواشى طرح اللذات
ف مواسم طرح العنبايه
فوق العتابات
وساعات
تِمْسك كُرباجها المنقوع
ف أزان الزيت
وتلف البيت
تبحث عن جسمى المتعرى
وتقطع فيه
وتمص الدم اللى بينزف
من نن عينيه
وتسهر عينى وتحكيلها
عن جلد الذات
وتخدنى لآخر جبانه
تعبانه.. فيها الأموات
الدنيا يا جدى اللى عايشها
كيف المراجيح
بتخدنى من تحت لفوق
وكأنى على ضهر الريح
وف ثانية ..تذغدنى أفوق
وألقانى بين الحيات
محتاج لكلامك يحرسنى
ويعد عليا الخطوات
*****************
رضا ابو الغيط
ليست هناك تعليقات:
إرسال تعليق