حاسب نفسك
حاسب نفسك كل يوم
قبل ما تغرق بقى ف النوم
شوف ماليك،واللى عليك
وان كنت ظالم ،او مظلوم
قبل ماييجى يوم وتلاقي
مايشفع ليك عتاب او لوم
،،،،،،،،،،،،،،،،،،،،،،،
لسه ياصاحبى فرصة معاك
وانت بصحة تنام وتقوم
ماهي دنيانا دار العمل
ودار الآخرة حساب معلوم
مهما تشقى فيها وتتعب
مش هاتنول غير المقسوم
خلّى المبدأ فيها الرضا
اسعي وخلى الحب يدوم
حب الخير ولكل الناس
ف بحر خيرك الكل يعوم
حب لغيرك،ماتحبه لنفسك
فهذا قول رسول كريم
افرد جناحك غطى العالم
وضَوِّى سماه بقمر ونجوم
وابدر ارضه تقاوى محبة
خلى حصادها يزيح لِهْمُوم
خليك بلسم ودوا لِجروح
خليك لسان حق المظلوم
خليك بسمة تسعد قُليب
مهموم من الحنان محروم
ونظرة رضا لقلب كسير
عايش وحده سنين بالكوم
أُنشر سلام في كل العالم
تبني صروح محبة تدوم
،،،،،،،،،،،،،،،،،،،،،،،،،
واوعاك مرة تظلم نفسك
. ولهواها تسلم تسليم
يبقي ف طريق الغىّ مشيت.
وف النهاية على مين ها تلوم
واللا ف مرة تظلم غيرك
فالله.. الله..لدعوة مظلوم
،،،،،،،،،،،،،،،،،،،،،،،،،،،
اهلك .من غيرهم راح تهلك
خلى وصالهم دايم دوم
بيهم تلقى كرامة وعزوة
حتى ان كنت فيهم مظلوم
سامح وخلي اجرك على الله
وآمن بعطيّة رب كريم
،،،،،،،،،،،،،،،،،،،،،،،،،،
وقلت لنفسي قبل ماأقولك
وم الخطأ انا مش معصوم
وربك هوّ الاعلم بينا
وربك هوً رؤوف ورحيم
،،،،،،،،،،،،،،،،،،،،
ليست هناك تعليقات:
إرسال تعليق