مش وقت جدال
من ديوان كلام عواجيز
***********
أمي الغاليه غلاوة الروح
من إمتى كان بينا خلاف
على مين يتشال أو مين يتشاف
بعيون القلب
من امتى كان بينا خلاف
على مين يتغطى برمش العين
أو مين يتغطى بطرف الشال
ف ليالى البرد
من امتى المال اللى ف جيبى
مش ملك ايديكى الاتنين
من امتى الحب اللى ف قلبك
ما يكفى يا غاليه الملايين
من امتى العين حاولت مَره
تتمرد ع العيشه المُره
لو حتى يومين
طول عمرى عايش خدامك
وتراب بيمهد لمداسك
يتمخطر زين
طول عمرى انا بسهر ما بنام
غير لما تنامى ف أحضانى
وأغطى حياتك برموشى
وادعي لك ربى يخليكى
وتقولى أمين
طول عمرك كنت بتدعى لى
بصلاح الحال
وتصُرى الأكل ف منديلى
وقت الترحال
وتخبى دموعك ف ضلوعك
علشان اطمن وأسافر
وأجمع ف المال
إيه اللى اتغير يا أصيله
خلاكى بتشكى من العيله
ودموعك تٍملا الحوَّال
من امتى بتقسى على ولادك
وبتدعى عليهم يتحرموا
من راحة البال
دول ياامه عيال
مش فاهمه معنى الحريه
ولا شايفه شكل الأهوال
كل اللى هاممهم يتغدوا
ويدوقوا الشهد المتخزن
ف الصُفه عند النحال
دول ياامَّه عيال
مش فاهمه معنى التجريف
وكلامهم وهم وتخريف
كل اللى هاممهم يتخانقوا
على نص رغيف
ونجاوب عن كل سؤال
دول لسه يادوب
بيحدفوا طوب
شغل الجُهال
فاكرين علشان طولم حبَّه
وشنابهم وصلت للجبهه
يتعدوا رجال
دول لسة عيال
أطفال
مش فاهمه االفكر اللى ف راسك
ولا عارفه أن المدارى
مش شرط يصارح كُراسك
ويصرح بيه الإرسال
مش فاهمه الصمت اللى مخبى
على نن عيونهم أسرار
ما تطيقه جبال
وان جالها الوقت هتتقال
ويحسوا إنك أم حقيقي
وف عقلك ضربوا الأمثال
دول لسه عيال
فاكرنها كلام
مش عارفه أن البشريه
مليانه لئام
بتحارب كل الأحلام
وهواها تفرق لمتنا
ونعيش كنعام
أو حتى عبيد
نمشيها شمال
دول ياامه عيال
لميهم تانى ف أحضانك
وف حضن الدار
ف بيوت الحُب اللى أوتهم
ليل ويا نهار
دول لسه صغار
ومسير الدنيا تفهمهم
مين هى الأم اللى عشانهم
اتحدت كل الأندال
مين هى الأم اللى استلفت
من طوب الارض وحضنتهم
علشان ما تعلى البنيان
وتغطى رموشها العريان
وتحسن وضع الأحوال
أمي الغاليه غلاوة الروح
وعبيرك دابما بيفوح
من امتى كان بينا خلاف
أو حتى جفاف
هيشمت فينا العزال
طول عمرك بتحبي الكل
وتصلحى وردك والفل
يا أصيله
مش وقت جدال
************
رضا أبو الغيط
ليست هناك تعليقات:
إرسال تعليق