عيد ميلاد شهيد
عيد ميلادك.. يوم عيدي
الفرق بينا كام يوم
أوّل ما شُفتك قُلتْ نصيبي
هديّة لي من الرحمــــن
ساعتها صَلّيت رَكعتين
وفضلت أدعو وأعيد وأزيد
بقالي في الدُنيا ذكرى
وشاركني فيها وليد
يارب احفظه من العين
لقيت فيك كُل ملامحي
كأنّك واخد شَكلي ورَسمي
من الفَرحة بكلّم نفسي
ما بقتش في الدنيا وحيد
يارب بارك وزِدني
لمّا يكبر يشيل همي
ويراعي كل اللي معاه
كل يوم يكبر ويعلا
والخير يزيد والحُب معــــاه
من ابتدائي لثانوي وجامعة
والصحبه تمللي تجري وراه
كل الناس تتكلّم عنه
وعن أخلاقه وفضله وعمله
كل سنة بعملّوا عيد
يحضر فيه كل الحبايب
القريب ويا البعيد
ويكون يوم غير عادي
التورتة ويّا الشموع
والكل رافع الأيادي
النهارده عيد ميلاده
كتبت اسمه بخط كبير
وحضر كل أصحابـــه
والقريب ويا الغريـــب
يعزوني في عيد ميلاد
أصل ابني مات شهيد
وأنا بلملم دموعـــــي
وعقلي تايه من التفكير
ما سك الشموع بايدي
والشموع رافضه تقيد
والشموع رافضه تقيد
بقلم الأديب/ مجدى متولى إبراهيم
ليست هناك تعليقات:
إرسال تعليق