(الحرافيش)
بعد تنقيحها وتم نشرها
من قبل
١ قصيدة الحرافيش
انا يا أمي من الحرافيش
انا ابنك ومن صلبك
واسمي واخده من اسمك
انا الدرويش
انا صخرك انا نهرك
انا بحميكي من قهرك
انا اللي تمللي في ضهرك
انا الجندي اللي جوا الجيش
انا يا امي من الحرافيش
وزي السمكة جواكي
في غير البحر مش بتعيش
ورغم الغلب انا صابر
ووسط الفقر نافش ريش
ولو عرضو عليا حرير
بعيش فيكي ولابس خيش
ولو يغروني بالجنة
وانا في النار
بقولك يامه متبكيش
انا يا امي من الحرافيش
*******************
وباكل فول وطعمية
ويمكن بيضه مقلية
ولو ملاقيش بكمل
يومي بالميه
وبحمد ربي اني بعيش
بنام مرتاح و خالي البال
ولا بيقلقني هم عيال
ولا خوفي علي الاموال
واخرة همي صرة عيش
انا يا امي من الحرافيش
*********************
بقوم الصبح من بدري
علي رزقي اوام بجري
وعشمي كله في ربي
يراضيني ميكسفنيش
انا يا أمي من الحرافيش
ولو مرة ببص لفوق
ومن همي بحاول افوق
الاقي نفسي حيرانه
واكون مخنوق
وروحي خارجه من جسمي
لكن بشويش
انا يا امي من الحرافيش
*********************
انا الواقف علي بابك
وكلي حماس
انا السقا لبستناك
وبسقي الناس
انا الصايغ في دكانك
وايدي تتوزن بالماس
وانا الفلاح بضربة فاس
وبروي ارضي بايديا
وياكل منها كل الناس
انا الشاعر في ديوانك
ببيع الشعر في القرطاس
*****************
انا يا امي مع يوسف
صبرت سنين
شربت المر من جوعي
وكلي انين
عشقت الصبر علشانك
وعلشانك فضلت امين
عبرت البحر مع موسي
وكنت الجندي في حطين
انا قصة كتبها نجيب
وسابني اكمل السطرين
بلف شمال والف يمين
ومن لبنان بروح الصين
وغير حبك ميلزمنيش
انا يا أمي من الحرفيش
انا ياامي من الحرافيش
..................
بقلم / رضا أبوشنب
ليست هناك تعليقات:
إرسال تعليق