الأحد، 29 نوفمبر 2020

مشتاقة ليّا ....... الشاعرة / ريم صلاح

 


مشتاقه ليّا
.............
قد إيه مشتاقه ليّا
لابتسامتي
ولطريقتي
ولحروفي
قد إيه مشتاقه فعلا
للقلم لحظة ما يحضن
فرحتي أو يمحي خوفي
كان مصاحب روحي دايما
كان بيقرا جميع حالاتي
وانفعالاتي وظروفي
يجري يتمشّى ف وريدي
ثم يرجع
ع الورق بالحب يطبع
كل حاجه هناك عرفها
كل شئ من غير ما ينسى
أي حاجه بعينه شافها
عدسه زوم قلبه المشاكس
كان بيلقط بيها منظر
قلمي كان ع الوصف أقدر
النهارده شهر واكتر
حبرقلمي عليّا عاصي
قلمي أصبح فجأه قاسي
أو ياجوز واقع ف حيره
زي حيرتي
أصله شايف صوره تانيه
ف انعكاس إحساس مرايتي
صوره تشبه أي حاجة
إلا صورتي
حتى قالها بدون مبالغه
ربما ف الشكل إنتي
بس ف المعنى اختلاف
إنتي كنتي الورد طارح
واللي باين عود بيدبل
أو مسلّم للجفاف
كل شئ جوايا خاف
من خريف طعم النهايه
دارت الأفكار معايا
والدموع نطت ف عيني
ليه يا دنيا بتكسريني
دا اللي كان بينِك وبيني
انعكاس معنى السعاده
النهارده بالبلاده
غارزه ناب الحزن فيّا  
قد إيه  
مشتاقه ليّا
.........
الشاعرة / ريم صلاح

ليست هناك تعليقات:

إرسال تعليق

فن البوستات كمال العطيوى