نفس النهار ...!
.............
من غير رتوش
الصبح مال على همس كلمات النهار
وقال ..!
خبينى م اللى جرى
خجلانه عينى م ضفاير الهمس
مش قادر المح ضى نور الشمس
على كلمة جوايا
محبوسه خايفه م البشر
مليت خلاص .. من كتر تكرارى
من احتباس الصوت فى الحنجرة
خلتنى انسى تراتيل المسا
واعلن تفاصيل النهار ..
خايف اصرح .. او ااقول .. م الخوف
دى الناس بيجرى عمرها لقدام
وأنا مش أنا .. أنا مش إمام
ممسوحه منى نظرتى م الشوف
عمرى بيزعق فى الخلا
أنا فرد عايش ... إنما .. كتر الزحام
علمنى اكمم جوه منى حروف ..
الناس خلاص .. متعكره م الخوف
.. والصورة طله .. مغيره شكلى
خالية الجناين من طلة الأزهار
خاليه البحور من مد يوصل للشطوط
يفصل ما بين جنتى والنار
خالية الغصون من بهجة العصافير
خاليه القلوب .. من ضحكة المخاليق
من رقص خيال االفوارس وعزفه ع المزامير
من كل يوم بيعدى
زى أنا .. وأنا مش أنا
خلانى اعلن .. على الملأ
اعلن براءة دمى م الشريان
اعلن خصامى للشعاع من طلة الشباك
من كل يوم اسمه على اسمى أنا
نفس النهار ..!!
شعر .........
حسن السحماوى ..
ليست هناك تعليقات:
إرسال تعليق