أنا مسافر خلاص يا ابني
امانة عليك ما تتعبني
وخد بالك على أمك
بلاش تهدم وانا ببني
........
وخد بالك من اخواتك
دا هما الفرح لو فاتك
و هما جزء من نفسك
وهما الكل في ذاتك
........
أنا بالغربة مش راضي
لكن مضطر ابان عادي
طفحت الكوتة مش نافع
وضاع العمر ع الفاضي
........
هسيبلك حمل روح شيله
وليل مش لاقي قنديله
وهم طويل ملوش آخر
بلاش يا حبيبي تمشيله
........
سايب لك كل ماليا
حياتي وعمري وعينيا
وشايل روحي على كفي
ولو راحت مليش دية
........
أنا مسافر ومش مبسوط
جايز راجع وجايز اموت
وجايز برضو انول حلمي
والاقي حتى تمن القوت
........
يا بلدي ياريت تسامحيني
انا سايبك على عيني
وكل منايا لو هرجع
في نن عينيكِ حطيني
........
أنا معاكِ ومش ضدك
و بوست كتير على يدك
وكل ماليكِ اتقرب
ألاقي الصد كان ردك
........
عشان خاطرك انا هنسى
ومش هكره ولا أاسى
ولو طال الرحيل بيا
على شطك اكيد هرسى
سميرمحمود
ليست هناك تعليقات:
إرسال تعليق