على الكورنيش ** سجال**
******* بين **********
عونى هشام* و * ايمان ذهنى
=================
عونى *****
تعالى يا ست،،،،،، نتفسح
نشوف الدنيا ماشيه ازاى
خلاص الزهر ،،،،،، بيفتح
وع الكورنيش هانسمع ناى
نرجع بعض ماضينا
خلاص الهم فاض بينا
لا عارف بكرا ايه شكله
ولا امتى يقول انا جاى
تعالى ياست نتفسح
ايمان*****
تعالي ياسيدي نتفسح
وع الكورنيش نسمع ناي
نقضى الليل ونتعشى
وع الكفتريا نشرب شاى
واهى ليله
نحقق فيها احلامنا
، نرجع بيها ايامنا
يا خدنا الموج يمرجحنا
ما نعرف فين مودينا
ونسمة ليل تفرحنا
نعيد بيها ليالينا
تعالى يا سيدى نتفسح
عونى*****
تعالى ياست نتفسح
بقالنا زمان بنتمرجح
مع الايام
تعالى نزحزح الضلمه
ونبعد عننا الاوهام
انا وياكى شفنا كتير
نفسى احلم بيوم تغيير
وبعد العسر يمكن خير
صبرتى معايا وصبرنا
كتمتى ماقلتى يا ريتنى
ولا شفت معاك تكدير
ياست الناس
معاكى قلبى والاحساس
بنينا حياتتا بالاخلاص
مكانك فى العلا بتقدير
تعالى ياست نتفسح
ايمان*****
تعالي ياسيدي نتفسح
نغير حبه ع الكورنيش
ولادنا معانا تتمرجح
ونتفاهم كدا بشويش
اعيش عمري وانا ف ضلك
واياك عني بقي تسرح
ياريت بكره يعود لينا
وننسي اللي جرا فينا
احنا شقينا والله كتير
وبعد الشده اكيد تغير
تعالي ياللا نتفسح
وع الكافتيريا نشرب شاي
عونى*****
شوفى ياستى
انا مش عارف
لو من غيرك اعيش ازاى
انتى النعمه وانتى البسمه
وانتى العمر الفايت كله
وبرضه الجاى
شفنا ولادنا
زهور حوالينا
ومرت بينا ظروف كات صعبه
ماقولتيش أى
انتى النور اللى فى عينيا
ودقات قلبى معاكى ياروحى
بتعزف ناى
ياللا ياستى نكمل فسحه
نفرح يومنا
محدش عارف بكرا
هايبقى شكله ازاى
وانتى معايا نعيش الفرحه
نقول للدمعه خلاص باى باى
تعالى يا ستى نتفسح
ايمان******
تعالي ياللا نتفسح
نرجع تانى أحلامنا
تعيش أولادنا قدمنا
ناكل ترمس،، نقزقز لب
نعيد الفرحه لايامنا
نقول احلي كلام ف الحب
يدوب عطفك مع حناني
معاك بنسي احزاني
وكل همومي وآلامي
لانك ضلي واماني
وشمس نهاري وزماني
وابو عيالي ... وسيد الناس..
تعالي ياللا نتفسح
نشوف الدنيا ماشيه ازاي
=====$$=========
مع خالص تحيات
عونى هشام
ايمان ذهنى
كل الشكر والتقدير لمجلة فن البوستات والعاملين بها على النشر والتوثيق..
ردحذفمع أجمل تحياتي🙋🏻♀️🌹