مستعده أمضى عقد
..........
أنا مستعده أمضى عقد
وأكتب وأمضى وأبصم من غير م أقول لحد
بس انت اوعى تكون زى اى حد
كون طريق مفروش بالورد
كون اهل وبيت وعمر فى يوم ما تحوجنى لحد
كون حيط اتسند عليه وقت الجد
كون بر أترمى فى حضنه وقت المر
كون ليل يضمنى ويلف دراعه حوالين كتفى وقت الهم
كون نجم أسكن فيه
وضى القمر طالل من شباكه يعزف لحن الحب
كون جبل أحتمى بيه وقت الذل
وإوعى تكون ظل
كون جذر يروى ورقى فرح وخير
خليك أب أترمى فى حضنه اللى بعده مافيش حد
خليك اخ يسند ظهرى وقت المر
خليك حبيب بسلم دايما يرطب القلب
ولا يتبدل ولا يغرنى يوم بحد
خليك صديق احكيله وقت اللعب ووقت الجد
وأنا امضيلك عقد
إن قلبى ليك وعمره فى يوم ما يسكنه حد
أمضيلك عقد
إن الفجر دايما يشرق وفارد ضيه من الشباك يدفى الفرش
وخيط العتمه عمره مايقرب
وعمر الخيانه ما تمس القلب
ما انا زرعتى من جوف الأرض
وعرقى مسك وعنبر لسه فايح من سجادتى المفروشه على الأرض
أمضيلك عقد
وأكون لك كير يحط وياك على اى أرض
ملعون أبو الضحكه أم شفايف لو تضحك لأى حد
ملعون القلب لوكان خايف من طوب الأرض
ملعون الحبيب لو هجر حبه وحلمه علشان لوم الخلايق
ويتخنق جوه ضلوعه
وأحزانه ودموعه تملا الخد ولا يشوفها ولا يحسها حد
ملعون الحبيب لو سجن حبه حبيبه جوه مخاوفه ولا صرح بالحب
أنا حبى دايما في الشمس
والعتمه لاتعرف طريقى ولا ليا فى الهمس
من إمتى الشمس بتخبى ضيها عن الخلايق
ولا النيل بيجرى وما يروى الأرض
إزرع حقولى بالخير والورد
وانا...انا أمضيلك عقد
وحكايتنا تترسم على كل قلب ولاعمرى فى يوم ما أخاف من حد
أمضيلك ....أمضيلك عقد
بقلمى/ سميه نور الدين محمد
ليست هناك تعليقات:
إرسال تعليق