ثورة قلب
قلب انْتَفَض
فكَّر لنفسه ف الحياة
حاول يكَسَّر كل قيد
ماسِك ف روحه
عمل جناحه طوق نجاه
علِّم على كل الوجع
ونادي حلمه اللي ارتجع
شَبَط ف بوح قلبه النَّدي
حَلَف وأقسم يبتدي
جَمَّع ف كفه كل معنى اشتاق إليه
وبص ع العمر الِّي باقى وحن ليه
لابد يبدأ ثورته
شاور لنبضات الحكاوي كلها
ورسم لها
راية وشِعار
شَبِّك حنينه ف كل نبضة
من حكاية حِلم بِهَا
واتْجَمَّعِت
دقات قلوب مع بعضها
ونزلوا ميدان الحياة
رافعين رايتهم دافيانين
ماشين بقوة نبضهم
أصل الحياة رجعت لهم
لكنه قلبي اللي انتفض
لسَّاه حزين
وقف على جسر الحنين
وشافها ضلمة سكته
فكر... رجع
تاني لحضن مْخَدِتُة
مفيهاش لاثورة ولاميدان
مفيهاش أمان
رجَّع ف روحُه نَفْضِتُه
منی عبد الرحمن
ليست هناك تعليقات:
إرسال تعليق