حكاية ........... ....... للشاعر المؤلف / حسن عمران

حكاية ...........

أيوه يامه حقيقي أسف..

واللي أنا خوفت منه..

لسه برضه.. لسه خايف!

ياما قلتي ومن زمان :

أوعوا أشوف الحب هان..

ولا ود كان وكان..

صدقوني لو حصل..

يبقي عداكوا الأمان.

واللي قلتيه ياما كان!!

صوتنا أصبح ألف صوت..

والسكوت مابقاش سكوت..

صوت وعالي..
صوت وعالي وانخرس عمي وخالي..

وكله قالك وانا مالي..

يكفي م الأيام تعبها..

هو انا ناقص ديابها..

هي حملت.. هي ولدت..

بددت صحة وشبابها..

هي نقت ما استخارت..

هي لفت هي دارت..

ويوم م تعبت مااستجارت..

قالت البركة ف زرعي..

عندي ليلي وناجي مرعي..

دنيا.. لوزة.. نوح وشافعي..

هم حصني وبصري سامعي..

وهم نوري وهم شامعي..

هم عزوه.. وهم سندي..

وهم فرحة وساكنة عندي..

وعيشتي وخدانا ف حضنك..

كنا شجرة وفرعت بحب قلبك..

كنا صوتك.. كنا سمعك..

واما الأيام تجور..

كان يعز عليها دمعك!!

بس شوفت يامه دمعك..

كان يوميها الجو غايم..

والرعود قاهرة العزايم..

وقلتي سبحانه وبكيتي..

هو بس اللي دايم..

ياه علي الليلة الأسيه..

لسه والله فاكرها

وجرحها بيعدي في..

يومها غاب وش أبويا م الوجود.. وانتهي البرق وخوفه..

وانتهت كل الرعود..

لكن الخوف جوه عينك مانتهاش

 وابتدت حروف كلامك رعشه يامه مانسهاش 

قلتي ذي ما بوكوا مات..

كله فاني ما حد عاش..

بس لتعيشوا بكرامة..

لإما عيشتكوا بلاش..

والكرامة لازمها قوة..

يعني بره ولا جوه..

أنتوا واحد.. قلب واحد..

عقل واحدحقه عايش ماتنساش..!! 

الله يرحم يامه قولك

 تحياتي.. الشاعر والمؤلف : حسن عمران