إحزن وابكي من الأيام
اللي تخلّى ملاك بينام
نام من تعبه ُ وكله ُ آلام
نام واهو غارق في الأحلام
نام وبيحلم إنه ُ يبيع
كل بضاعته ُ اللي معاه
لولا بضاعته ُ . كان هيضيع
مليون حلم لأسرة وراه
ع الأسفلت وفوقه ُ رصيف
نام والشمس هيه غطاه
نام مش داري في نص طريق
أرض الشارع كات ضمَّاه
نام واهو ساكت من غير صوت
لكن جسمه بيصرخ اااااااه
فيه كام واحد عدى و مَرّ
عميا قلوبهم مش شايفاه
و مفيش صوت ل ضمير أنّبهم
أو اتخيل إنه ُ ضناه
هوه دا شارع ولا كابوس !!؟؟
ليه الناس دي مش حاسّاه !!
ايمته يكون منظره ُ محسوس !!
رغم صعوبته ُ ورغم آساه
طفل برئ ربنا بيعينه ُ
و بيحميه ولا يوم ينساه
من قهرته ُ السما ضحكتله ُ
عِرف إنها مفتوحة ل دُعاه
نام مطمن واثق إنه ُ
رزقه ُ هييجي بإذن الله
ليست هناك تعليقات:
إرسال تعليق