عفاف
سهم عيونها رشق بالقلب قلت عواف
ردت سلامي بخجل يا طبعها الخواف
الكون بحاله وقف و فكري رايح جاي
قلتلها انتي الأمل قالتلي اسمي عفاف
صحباتها اتغمزوا قالت يا عيب الشوم
فوتني يادي الجدع ليضربوك بالشوم
قلتلها قلبي ف خطر و البعد عنك موت
مفارقش أموت ب غدي ولا أموت اليوم
قالتلي روح يحرسك وتحيا ألفين عام
عين الإله تحرسك امشي بقي بسلام
فين السلام يا قمر وعقلي شط خلاص
قلبي ف بحرك غرق وانت ال قلبك عام
لو كل يوم انظرك أصبح كما السلطان
معجبني غير منظرك من وسط إنس وجان
قالتلي امشي بقي دا أبويا طبعه شديد
قلتلها مش ب يدي . خلينا ساعة كمان
حدفت قوام منديل قالتلي خود تذكار
قلتلها ده قنديل و يخلي ليلي نهار
مشت ونا مامشيت مالقتش رجل حداي
ولنفسي حتي نسيت واقف ليالي كتار
عدوا البنات كلها ومستني ليها ظهور
وقلبي مفتوحلها مفروش بأحلي زهور
يومين تلاتة أربعة وهي فينها عفاف
قالوا خطبها جدع ظابط وابوه مأمور
............................
الشاعر /ابراهيم دعبس
ليست هناك تعليقات:
إرسال تعليق