وبتلومني إن أنا نسيتك
واني فى لحظة مليتك؟!
ياراجل فوق على حالك
وشوف فعلك وأفعالك
دانا من كتر إهمالك
ندمت إني حبيتك
.........
تعالى يلا نتحاسب
مين الخسران ومين كاسب
ومين فايز ومين راسب
ومين في عيونها حطيتك
..............
منا عشت بأساك راضية
وكان نفسي الحياة ف قربك تكون هادية
لافيها سعاد ولا لبنى ولاشادية
ولابُعدك وتشتيتك
................
وشوف كام مرة كلمتك
وعاتبتك وفهمتك
وحذرتك وهددتك
وأمنتك ووصيتك!
............
لكن أبداً ماحسيتشي بأوجاعي
ولايهمك ولا بتسأل ولاتراعي
ومن جهلك فشلت كمان ف إقناعي
أنا مش فازة مرصوصة فى ديكور بيتك
..............
وفين راحت مواويلك وأشعارك
وفين حضنك وفين حبك وفين عزمك وإصرارك
دانا كنت اللي في قلبك وفى عيونك وأفكارك
ومن عمري ياما إديتك
..............
فدلوقتي عتابك ده ملوش لازمة
لأنك إنت بغبائك صنعت بإيدك الأزمة
فخد نفسك وخد حالك وانا بسكوتي ملتزمة
ياريت تفهم معادش خلاص ده توقيتك!
ليست هناك تعليقات:
إرسال تعليق