قالوا لِك إيه…؟
قالوا لِك عني إني رَجيم
وإني رَميت خلاص طوبتِك
أقول لِك إيه…؟
أقول أنا قلبي من غِبتِك
بيبكي عليكِ في الليلة 200 مَرة
نتاج شوقي لضَي عينيك
أقول إن إحنا أيامنا…
خلاص مابقيِتش مُضطَرة
تجَمَع،
شَملِنا،
تاني،
أقول إن إنتِ وحشاني؟!
ما يَاما أنا قُلتها بقهرَة
وحشتيني،
ووحشاني،
ومشتاق لِك،
مانيش بَعتِب عليك جَهلِك
ولا طالب أكون أهلِك
لَكِني حقيقي أستاهلِك
أقول لك إيه…؟
الناس إقتصت من رُوحي
وقالولي إزاي…؟
هاتكَمِل دونها العُمر الجاي !
كان والله مُجرَد بس سُؤال…
فَتفِت لي قُليبي وجاب أخري
الناس فَكراني فـ حُبِك توبت
وأنا باحبي فـ حُبِك مش باجري
محتاج زَقة…
علشان حُبِك محتاج لسنين
أتعَلِم فيها إزاي… أبقى
إنسان مِتجرَد م الإحساس
إنسان إبليس …زي مَا قالوا
أو زي ما شالوا إللي زَرَعتُه
طب أقولِك إيه…؟
لو حُبِك فَكَر إنُه فـ يوم يقتِل فيا
أو إنُه يمِس الحنيه الساكنة وريدي
وحياة حُبِك كُنت بإيدي…
"دوغري دَبحتُه"
قالو لِك إيه…؟
العالم والله بكُل ما فيه
لو قالوا أضعاف ما بـ يتقال لِك
ما يهز إللي فـ قلبي إتشال لِك
من شوق،
وحنين،
بُعد المسافات،
"العام بيمُر فـ شَكل ساعات"
أحزان بالكوم…
وبحور وأنهار على شَكل دموع
وأنا وَحدي باعوم وِسطَها مَوجوع
"ومافيش ولا إيد إتمدت لي"
غير أملي إللي زَرَعتُه بـ إيدي
وفضلت أسقيه،
وأهو راح مني،
زي ما روحتي،
عارفة إللي أنا فيه…؟
بيساوي الموت…
وأنا عندي أموت…
لو موتي هايشفع يوم عَندك
خفي فـ عِندك…
أنا مُش شيطان جاي أعاندِك
ولا طالب تاكلي التُفاحة
أنا ضلعي المكسور يا حبيبتي
فَتفِتُه عشان …
يكمَل تكوينك وسط الخلق
من أول وحَمِك،
ونزيفك،
ولوجع الطلق،
"ولغاية ريقي إللي دمجتُه مع حَبِة تَمر"
علشان تبدأي يا حبيبتي العُمر …ونكون أحباب
طب أقولك إيه…؟
إختلف الأمر…
والدنيا خَدتنا و وديتنا… وبقينا أغراب
#مخلوف
#قالوا_لِك_إيه
ليست هناك تعليقات:
إرسال تعليق