مهما قلت وعدت عنه ما انصفوش
هو راجل كان حنين كان بشوش
كان ف وقت الشدة ثابت كان قوي
وان طبول الحرب دقت كان جيوش!
..........
قطر ابويا كان بيجري مالوش وقوف
واحنا ماشيين من وراه زي ترتيب الحروف
كان بياخد من حياته ويدي لينا
كان أمان بيصد عنا أي خوف
...........
كان حصون ندارى فيها و كان دروع
كان شجر وبيرمي خيره ع الفروع
كان راحتنا لما نبكي وقت ضيق
وقلب نابض خد مكانه في الضلوع
................
كان بيتعب ليل نهار علشان نعيش
عمره مرة مقالش آسف او مافيش
كان بيلغي نفسه خالص م الوجود
علشان نبان او حتى نظهر ف الافيش
..........
حضن ابويا كان يشيل الكون يساعه
وعمر ابويا ماحد حبه وهو باعه
كل حاجة حلوة كانت لايقة ليه
والحنان ده كان بإسمه وكان بتاعه
.........
ياما شال الحمل وحده وكان جمل
ياما جرح وطاب بإيده واندمل
ياما سرسب من حياته كام سنة
علشان يشوفنا مرة بالغين الامل
.......
الف رحمة عليك يابابا والف نور
يااللي نايم جوه احضان القبور
انت مُتّ بس فينا لسه عايش
انت غايب بس في حكم الحضور!
#سميرمحمود
ليست هناك تعليقات:
إرسال تعليق