قارئة الودع والكف
قالتلي هات كفك
عشان أشوف حظك
حبيبتك راح تعفك
منين ماتروح هتصونك
هتحب فيك حنانك
هتتعود على أمانك
وتحَوط على بستانك
ورودك قبل غِصونك
قالتلي إرمي بياضك
أبين زين أبين
الودع هرميه قصادك
هو اللي راح يبين
زود ف قرشناتك
ما تبخلش ياحنين
إتحَيلت عليا كتير
لكن قلت أجَرب
جَربت لقيت تفسير
عكس مانا مكهرب
صدقوني دا كله دجل
اللي مصدقه بيشرب
قالتلي هتسكن قصر
هيبقالك شأن كبير
هتكون رئيس مصر
أقل شيء وزير
سمعت أنا الكلام
والحال زي ماهو الحال
ما تحققتش الأحلام
غَرقان ف الفقر يا خال
بَتعِصِر مش أي عَصر
ماحصلتش حتى غفير
قالتلي راح تعيش
100 سنه وأكتر
إزاي ما تسألنيش
الودع اللي قدر
هات كفك أقراه
فيه خط كله أفراح
مش شايفه غير حياه
بستان مافهش جراح
هتحب بنت أميره
قموره إسمها سَميره
أُمها تبقى سفيره
وأبوها بدرجة سفير
خدت بعضها وطارت
تقول لخويا سمير
نفس الكلام كَررت
مفيش مِللي تَغير
بالذمه مش دا بكش
أُحكم إنت وفَسر
ليست هناك تعليقات:
إرسال تعليق