قبل ماتيجي تدق الباب
قدم لينا ف كشف حساب
وهات العمر اللي سرقته
وكل حبيب ف وجودك غاب
.....
وهات احلام وياك راحوا
واعزم ع الفرح بمفتاحه
واثبت للضيق انك قادر
تاخده من ايده لبراحه
......
طبطب على كل اللي اذيتهم
واللي انت قتلت وعزيتهم
واللي انت فرحت بأوجاعهم
ورميت من نارك على زيتهم!
.........
كلم ف الشمس وعرفّها
ان احنا هنفرح من شوفها
والدنيا علينا لو ترضى
هنكون كالصابع ف كفوفها!
.........
وياريت ماتجيبش معاك ذكرى
ركز وحياتك على بكره
واختار ف قلوب بتقدّرنا
ماتجيبش قلوب تطلع ناكرة
...........
خفف ف رياحك وهبوبها
وارفع م الطيبة ومنسوبها
واخصم من فرحك وادينا
واوعد احزانك برسوبها
..........
وعشان نسمحلك تتفضل ...
ماتجيبش معاك مُروحنضل
ولا كسرة نفس وتنهيدة
ولا حزن يعشش او يفضل
........
وساعتها هنفتح ابوابنا
ونقولك اهلا ياحبيبنا
نورت ياعامنا وشرفت
ونكون بوجودك رحبنا
سميرمحمود
ليست هناك تعليقات:
إرسال تعليق