ضد الهكسوس
......
ما انا كنت هناك
عند الشجراية اللي بتطرح للناس أحلام
و ريحتها جميلة عشان كارهة تفرق أوهام
كان وقت العصر و انا لوحدي
جوايا حاجات
مشغول بالصبح اللي اتأخر
و العمر ساعات
على غفلة ندهني ولد أخضر
ف عنيه حكايات
وأماني بريئة صغنطوطة... نساني آهات
كان ماسك صورة بنوتة و جمالها خيال
و حلفلي يا عمو انا باعشقها و العشق حلال
تعرفها منين احكي و فضفض و اصدقني القول
و الله يا عمو انا ما باكذب و هاقول على طول
على غفلة سكت و انا بستغرب
ما تقول يا جميل
قال خايف بكره أما هنكبر هيدوسنا الليل
أنا حلمي ماليني اما هنكبر هنجيب أولاد
و نحابي عليهم.. نراعيهم و نعيش أسياد
أنا جيت للشجرة و كان نفسي ألاقيها بخير
ألاقيها تطبطب على كتفي و تبوسني كتير
أتاريهم نسيو يصحوها و الطرح أهو مات
دا ورقها دبل و فروع ماتت.. غرقت ف سكات
معلش حبيبي و قوم بينا نرويها أمان
بالمية الطاهرة المبروكة و بحضن حنان
أنا و انت و ناس ياما معانا ما احنا راضين
و دموع ف عنينا هتجبرنا نسقيها حنين
لكن انت ما قلتش مين هي و غاويها ازاي
قال قالو زمان اسمها خضرة مع بكره الجاي
ف كتبهم مصر المحروسة و هرم مع نيل
أنا واحد وسط بشر ياما ف قلوبهم سيل
بنحب ترابها و شوارعها و نجوع و كفور
على غفلة حضنته و على خده ما شبعتش بوس
علشان ف عنيه شوفت تحتمس ضد الهكسوس
...........
الشاعر فهمي علي نصر
ليست هناك تعليقات:
إرسال تعليق