الوش التاني ... للشاعر / حسني همام

 

* الوش التاني *
.................
يا دنيا مالك مش مطوعاني
كل ما اقول هتروقي وتحلي
تسيبيني برده أعاني
يا ترى حظي معاكي كده
ولا انتي معنداني
وعنادك هيستمر ويطول
ولا هيجيلو يوم ويخلص
واشوف منك الوش التاني
ولا هيفضل ملازمني
وكأنه اتخلق علشاني
ما هو لازم شوية أبيض وشوية أسود
ميبقاش كله أسود
ما أنا برده إنسان
طب غيريلي الأسود شوية
وخليه حتى رمادي
عشان افوق شوية من الغيبوبة
واقدر أشوف قدامي
عمالة تطبلي على راسي من غير رحمة
وطبلك صدقيني بيوجع أوي
وبيخليني اتالم وأعاني
خسرت فيكي الأحبة
وفقدت فيكي الخلاني
ناس من أهلي وناسي
رحلوا بلا استئذان
وجيران خرجوا من الأوطان
وغيرهم واقعين في بعض
وبيضحك عليهم الجاني
واتفركشوا الأحبة
وياترى مين هيقدر يجمعهم تاني
ولا زالت أجزاء محتلة من اوطاني
والمال لما اعوزه ملاقيهوش
أصل المال جبان
والناس اتغيرت كتير
ومعدش فيه أمان
والصحة كمان معدتش مسعداني
يا دنيا كفاية كده بقى
عايز أشوف منك
الوش التاني

حسني همام
جمهورية مصر العربية
16/12/2018