مَعادش لساني راح يِنطَق
حروف إحساسها يِتكَلِم
يقول بَهْوَاك
بِتِوْحَشْني
يِهِز القلب وَيَّا الروح فِ شرايينَك
ويِحكي عن لُقا سنينَك
ويوْصِف دمعة فِ عيوني بِتِفرَح بيك
ونَبضِةْ قلب بِتسَلِّم بشوقي عليك
وكلمة تشِد إحساسَك
تِهزَّك من كعوب شوقَك
لِحَد الهَمس من راسَك
مانيش قايلَة كلام يُرقُص
يِرَقَّص كل خطواتَك يغنيلهَا
يِلَحَّن دَقَّيات قلبَك يِحِنِّلها
يِعَبَّر عن حاجات ياما ف سَما رُوحي
وحِلم ياريتُه يتحَقق
واعيشُه ف هَمْهَمات بُوحي
مانيش قايلَة بحبَّك مُوت
بِتِوْحَشْني
وهاسكُت وانسى أشعاري
وصُوتَك جُوَّه فِ ملامحي
ولاهازرَع فِ أرضَك شُوق
وحُب وحَب من قَمحِي
مانيش قايلَة
سَكَت خَلاص
ليست هناك تعليقات:
إرسال تعليق