مسح السلم .. !!!
صحيت م النوم على دوشة
لجار ماسك خناق جاره
شتيمة وضرب ومناوشة
وكل فريق بأنصاره
وسال الدم ع الباسطة
وكل الجيرة ملمومة
يحاولوا يوقفوا العركة
وكل حواسي مرتبكة
لا انا فاهم سبب ليهم
ولا ف وضع ان انا اتكلم
وحاجة بتشبه السلطة
حاولت اسأل صاحب بيتنا
فقال لي حريمهم اتشاكلوا
عشان مين يمسح السلم
عزيزة تقول دا دور سلوى
وسلوى تقول ...
دورك انتي
يامفعوصة في دور بنتي
ولا مرة تقول خالتي
يحطوا عليها ويشيلوا
وحتىٰ الدلعدي جوزها
مشجعها ترازينا
وجايب بلوة تبلينا
وصوتها يجيب باب الحارة
ولا ... بيهمها جارة
وكل الحتة كارهنها
زهقت خلاص وفاض بيا
يااعزل أو تغور هيا
شوية وجه علىٰ صوتهم
شيخنا وعمنا ثابت
لاقينا الجوز وقف ساكت
وبان خجله علىٰ وشه
كبير الحتة بص لهم
وقال ياولادي مايصحش
نضَيَّع عِشرة من هفوة
ياخيرة الحارة والصفوة
وتربيتي
وجيران بيتي
ودايما بافتخر بيكوا
إلهي المولىٰ يهديكوا
بسرعة حضنوا بعضيهم
وقالوا شطان دخل بينَّا
سامحنا ياسيدنا ع الغلطة
كانت ورطة
حريمنا ف عِنْدَهَا فِرطة
تمللي يولعوا الجمرة
وكل الجيرة عارفينَّا
سعيد وحبيبه ابوسمرة
عزيزة أوام باست سلوى
قالت ...
سامحيني ياخالتي
أنا غلطانة من ساسي
لفوق راسي
ولجل لساني هرضيكي
ماعدتش تاني هتكلم
دورين انا همسح السلم .. !!!
بقلمي أحمد أبو عاصم
ليست هناك تعليقات:
إرسال تعليق